Hoşniýetliligiň we parahatçylygyň ýoly
37Türkmenistanyň hemişelik Bitaraplygynyň şanly 30 ýyllygynyň bellenilýän ýylynda halkymyzyň parahatçylyk söýüjilik ýörelgesini wagyz etmek, dünýä ýaýmak we ýaş nesillere öwretmek asylly ýörelgedir. Halkara parahatçylyk we ynanyşmak ýylynda geçirilýän dabaralaryň, wagyz-nesihat çäreleriniň uly manysy bardyr. Bu dabaralarda ýaşlar halkymyzyň asylly ýörelgelerine aýdyň göz ýetirýärler, hoşniýetlilik ýolumyz hakynda düşünje alýarlar. Hemişelik Bitaraplyk ýörelgesi we parahatçylyk bir-biri bilen aýrylmaz baglanyşyklydyr. 1995-nji ýylyň 12-nji dekabrynda Birleşen Milletler Guramasynyň Baş Assambleýasy tarapyndan 185 döwletiň biragyzdan goldamagy bilen Türkmenistana hemişelik Bitaraplyk hukuk ýagdaýy berildi. Şondan bäri ata Watanymyz öz üstüne alan borçlaryna ygrarly bolmagyň nusgasyny görkezip gelýär, parahatçylyga, dost-doganlyga, özara peýdaly hyzmatdaşlyga esaslanyp, ösüş ýoly bilen öňe barýar.
Garaşsyz Türkmenistanyň hemişelik Bitaraplyk hukuk ýagdaýy 2015-nji ýylda BMG-niň Baş Assambleýasy tarapyndan ikinji gezek ykrar edildi.
Berkarar döwletiň täze eýýamynyň Galkynyşy döwründe ýurdumyzda durmuşa ornaşdyrylýan beýik işler halk bähbitliligi, şeýle hem umumadamzat ähmiýetliligi bilen aýratyn many-mazmuna eýe bolýar. Şonuň üçin hem Türkmenistan dünýäde parahatçylygyň merkezi hökmünde ykrar edilýär. Şunda hemişelik Bitarap Türkmenistan howpsuzlygyň berkemegine, döwletara gatnaşyklaryň ösmegine, hoşniýetli hyzmatdaşlygyň pugtalanmagyna uly ýardam edýär.
Häzirki ajaýyp döwrümizde baky Bitarap Watanymyzyň dünýädäki abraýy barha artýar. Hormatly Prezidentimiziň alyp barýan daşary syýasaty barha ilerläp, abraýly halkara guramalary, ilkinji nobatda, Birleşen Milletler Guramasy we onuň düzüm bölekleri, dostlukly goňşy döwletler bilen özara hyzmatdaşlygyň işjeňleşmegi bilen, ýurdumyzy okgunly ösdürmäge ýardam edýän özgertmeler, ägirt uly işler durmuşa geçirilýär. Bu işleriň özeninde dünýäde parahatçylygy pugtalandyrmak we ykdysady durnuklylygy üpjün etmek boýunça tagallalar durýar. Gahryman Arkadagymyzyň beýik başlangyçlaryny mynasyp dowam edýän hormatly Prezidentimiziň taýsyz tagallalary bilen Türkmenistan netijeli sebit we halkara hyzmatdaşlygyny ösdürmäge gönükdirilen işleri üstünlikli durmuşa geçirýär. Eziz Diýarymyz ösen döwletleriň hataryndaky ornuny pugtalandyrmak bilen, özüniň ykdysady, serişde we önümçilik kuwwatlyklaryny ulanyp, halkara gatnaşyklaryň gerimini giňeldýär.
Halkara parahatçylyk we ynanyşmak ýylynyň şanly baýramlara we möhüm ähmiýetli, şatlykly wakalara baý ýyl hökmünde taryha girjekdigi şübhesizdir. Türkmenistanyň hemişelik Bitaraplyk hukuk ýagdaýynyň dünýä bileleşigi tarapyndan ykrar edilmeginiň 30 ýyllygynyň dabaraly belleniljek ýylynda ýurdumyzyň ähli ulgamlary bilen bir hatarda, saglygy goraýyş ulgamynda hem üstünliklere we belent sepgitlere ýetiler. Ýurdumyzda häzirki döwrüň ösen talaplaryna laýyk gelýän iň kämil tehniki enjamlar bilen üpjün edilen dürli maksatly desgalaryň yzygiderli gurlup ulanylmaga berilmegi bu aýdylanlaryň ýüze çykmasydyr. Bularyň ählisi eziz ildeşlerimizi täze döredijilik üstünliklerine, zähmet ýeňşine ruhlandyrýar. Çünki şanly baýramlara zähmet üstünlikleri bilen barmak, ösüşlere mynasyp goşant goşmak asylly ýörelgämize öwrüldi.
